( 655 ) ام حنا شهيد لقمة العيش كلنا مسافرين

صدرى العددالاول فى يناير 2010

               
                               كلنا مسافرين

- - - - - تخاريف

========                                          كلنا مسافرين

بقلم عادل رشاد :

عادل رشاد

زى كل الناس عاوز أعيش فى أمان وأتهنى بالأحلام

زى كل الناس عاوز أعيش يومى بسلام وأفرح مع الأيام

قلت أسافر وأتغرب وأشتغل وأعمر وأرجع لبلدى بسلام

عاوز أعلم ولادى و أستر بناتى العيشه مش بس كلام

ياأمى السعى على لقمة العيش جهاد -- واللقمه لما بتيجى بالعرق حلال --باركيلى يامه وادعيلى يامه خلينى أسافر وأنا مرتاح البال

أمك خايفه عليك ياولدى خليك هنا ورزق هنا زى هناك -- قلبى مخطوف عليك ياولدى ما انت راجلى -- نأكلها بدقه وأخدك فى حضنى وآكل نص بطنى وربك الرزاق -- مافيش طير ياولدى بينام جعان -- خايفه أموت ياولدى وإنت بعيد مين هايتقبل العزاء ؟ -- مش هاشوفك تانى ياحنا أيه فايدة الفراق ؟

ياأم حنا أيه جرالك يعنى هيه أول مره أسافر -- أبنك راجل وعلى الصعب قادر وكام شهر يامه وأرجعلك تانى -- عارفه يامه ده آخر مره وأرجع وأستر البت مرمر -- وأقعد معاكى وأطبخ غداكى وأخدك وأروح الكنيسه تانى -- وأقول لأبونا أدعى لأمى -- ده هيه عمرى وعمرى فداكى -- بس ادعيلى يامه أروح وأرجع بالسلامه

ياواد ياحنا قلبى داعيلك انت وكل اللى مسافر -- والرب شاهد لرضايا عنك تروح وترجع بالسلامه -- بس ابقى تقل عليك هدومك وخلى بالك من فلوسك وأوعى ياولدى تنسى نفسك بر نفسك وكل كويس -- وخلى بالك من اللى يخونك وصون شبابك واحمى ضميرك وخليك ماشى عدل فى طريقك --

أوعى تسكر أو يوم تعربد وأعرف ان ليك حبيبه -- زى ماهاتصون الحريم ربنا هايصون لك حبيبه -- الرب شايفك اوعاه يزعل خليه

يشوفك وانت بتسعى بالخير دايمآ وانت بتكدح -- وخلى بالك من صحابك ومن جيرانك هما دايمآ بيطمنونى عنك --

الواد إليا ابن عمك بطرس كلمنى من هناك --

 قالى ياخاله واحشنى أكلك بنام وبحلم بفطيرك وبطك -- هاعملكم كام فروجه مع بطتين وحتتين جبنه قديمه مع فطرتين -- أول ماتروح ياولدى اتلموا كلكم مش بس انتم الأتنين والواد سعيد ابن عمك على ومحمد ابن حسنين وكلوا سوى علشان البركه تزيد وقولهم لو عزتم تانى هابعتلكم مع المراسيل --

هاتسافر امتى ياولدى والرب راعيك ؟ -- بكره الفجر يا أمى لو أراد الكريم

خلى مراتك تسويلك خلجاتك وتلململك حاجاتك وأخذها فى حضنك ياولدى حسسها بحنانك -- وقبل الفجر ياولدى هاأصحيك على ماتتشطف أكون غليت لك اللبن وأسقيك -- والوكل اللى عملاه لك فى الشنطه هاتلاقيه بس اول ماتوصل بالسلامه ماتنساش تدفيه --

وعدها ببناء بيت جديد عند عودته ليته بقى معها ولم يَعِدها 

يا أم حنا ارتاحى وانا هاخلى مرتى تسويه -- يابنى لو ماكنتش اتعبلك انت هاتعب لمين ؟ اقعد مع مرتك مسكينه بتبكى على فراقك ياحزين -- طبطب عليها ياولدى وقولها مش هاغيب -- حاضر يامه وتصبحى على خير

ياواد ياحنا قوم اصحى سخنتلك الميه علشان تتشطف وعمك سيد جى بالعربيه فى الطريق -- حلف ميت يامين ماحد هايوصلك الا هوه علشان تخلى بالك من ابنه أمين

صباح الخير يا أمى ياست الغالين ----- يسعد صباحك ياولدى وتعيش لى طول السنين

لبست ياولدى قلت لك البس تقيل وخد اشرب اللبن يدفى صدرك -- عمك سيد جه بالعربيه أوام

يامه سلام يا أغلى الغالين-- بالله عليكى ماتبكى يامه خلينى فى حضنك من غير دموع -- فين ابتسامتك خلينى اشوفها تنورلى الطريق -- أدعيلى يامه --

روح يابنى الرب راعيك --وتسعد فى دنيتك وتكون آخرتك فى نعيم -- سلام ياحبيبى مش كنت تخليك ؟ ياولدى خليك

دون ذنب جنوه 

حنا وصل وبعت لأمه يطمنها عليه خلى بالك يامه من مرتى والعيال والبيت والعجله والزرعتين -- وخدى بالك من نفسك وأول ماأقبض هابعتلك قرشين

ياساتر يارب فى صراخ وعويل فى البلد ياترى فى ايه ؟ --

كل الجيران اتجمعت عند ام حنا ودموعهم سايله سيل -- جرت أم حنا عليهم

فى ايه ياشيخ محمد بتبكى ليه -- وانت يابونا قولى حصل ايه -- أبنى جراله ايه ؟ أوعوا يكون مات مخبين عليه ايه ؟

بتهزوا راسكم والدمعه فى عيونكم -- حنا مات -- حنا مات -- آه ياولدى يازينة الرجال --

مراته جت تجرى وولاده عماله تبكى هو أبونا عمل ايه ؟ عرفوا حكايته أدبح هو وحبايبه -- من ناس معدومى الضمير -- الأم تصرخ وتبكى والزوجه تحط التراب على راسها وتشكى والعيال على الأرض تتمرمغ فى التراب وتجرى

مهما تقول انه شهيد وإنه عند الله كريم حزن الوداع امر من صبر السنين --

ياكفره ياخينين بأى مله وبأى دين استحليتم الدم وقضيتم على الناس الشقيانين -- هاتقولوا ايه لربكم يوم الدين ؟ لما يسألكم هما عملوا ايه المساكين ؟ مين اللى يستحق الدبح أنتم ولا الناس الشغالين على فيض الكريم ساعين ؟ --

الأم من كتر بكاها أغمى عليها -- جالها حنا فى منامها وقالها فوقى يامه أنا الشهيد --

عارفه يامه قصة ابراهيم ؟ لما حطوه فى النار وماحسش بأى تعذيب ؟ -- احنا كمان ياأمى ماحسناش الا ونحن فى جنة النعيم --

أوعى تبكى عليه وخلى قلبك حديد هما موتونا فى الدنيا لكن احنا فى الآخره عايشين فى جنات ونعيم لكن هما فى جهنم خالدين --

قدّم العزاء
بعد ان اخذ بالثأر عبد الفتاح السيسى برافو والبقاء لله 

شفت كل المسلمين جم عزوكى فرحت يامه بيهم -- أصل الشهامه بتبان فى وقت الألم والأنين -- عارف انهم مش هايسبوا حقنا ولا دمنا هايروح فطيس --

اصلنا امه واحده عايشين على تراب مصر مايفرقش المسلم عن المسيحى الا الموت

وكل بيت فى البلد حاسس ان ابنه هو اللى مات شهيد -- روحى فداك ياوطن

وكلنا مسافرين --كلنا مسافرين

*** فعلا كلنا مسافرين بس يابخت من كان معاه زواده وزاده 

      الى اللقاء مع تخاريف عادل رشاد 

 لكم منى كل التحية ولمصر الحب كله 

                عربى السمان