( 583 ) ام الشهيد احدث تخاريف عادل رشاد

صدر العدد الاول فى يناير 2010

   اصدقائى ... عادل رشاد وابداع جديد 

تخاريف ----- آه يابلد مين من ولادك قتل الولد ؟

الكاتب والاديب عادل رشاد 

حين تسيل الدماء على الرمال لايسعنا غير البكاء

هانت علينا الروح -- وأصبحنا بالسر نبوح -- وكتر البكاء والنوح -- والقلب بات مجروح --

أمانه ياحمامة السلام عدى -- -- وخذى ورد من أرضى -- وعلى قبر الشهيد هدى --وقولوا للشهيد انت عايش وده قبرى --

إسأليه مين موته ؟ -- اليهودى ولا ابن حتته -- طب هو مات ليه وأى جرم إرتكب ؟ --مش هو كان بيحمى الوطن -- بالليل سهران وبالنهار فى عز الشمس واقف بطل --

يحرس بُنيه فى الطريق من كل البشر -- مش أنا كنت نايم فى أمان وهو حارس بلد --ولو فى يوم حد حاول يغتصب شبر أرض نلاقيه واقف أسد --

أمانه ياصاحبى ياللى فى سيناء قولى ايه عمل الولد ؟ -- عشان تجيله طلقه غدر من غير سبب -- هل هو للأرض اغتصب ؟ ولا حارب فى اكتوبر وانتصر ؟ -- مش العدو كان للأرض مغتصب ؟ -- مين اللى جاب الأرض ومين اللى انتصر ؟ --

بالله عليك ياصاحبى قولى ماذا فعل البطل ؟ -- علشان دمه يسيل سيل وياريته سال فى الدفاع عن الوطن -- دمه سال من خسيس مايعرفش يعنى ايه معنى الوطن --

لما قالوا لأمه مات -- قالت هو الموت فيه هزار – اخص عليكم ياولاد -- ليه تقولوا إبنى مات ؟ -- أبنى وهو ماشى مال علىّ -- باس ايديا -- خدنى فى حضنه وقالى يامه هاتوحشينى -- قلت له إجمد ياواد خليك بطل -- بس إتصل كل ماتلاقى وقت علىّ إتصل --وهو حاضنى وف صدره واخدنى حسيت بشكه فى قلب الولد -- حستها جوه فى قلب أمه أصل فى شريان بيمر بينى وبين قلب الولد --

ايه ياولاد فين الولد ؟؟؟ هو باعتكم تاخدوا لبسه ؟ ولا فى نوع من الأكل اشتهى ؟ أصل ابنى بيحب أكلى -- بيقولى يامه الأكل كله من غير ايديكى مالوش ثمن -- عالعموم كل اللى عايزه هادهوله -- وأبعت معاكم حتتين جبنه وبالمره أعمله قرصتين وشوية عسل -- اصل السيد بيحب العسل --

يام السيد حرام عليكى اسمعينا -- السيد ابنك مات شهيد -- -- قالت ساعتها هى الحرب قامت وابنى شهيد ؟ -- قلنا لها لآ يا أم الشهيد -- قالت يبقى ابنى مات فطيس -- قولولى مين موته عشان آخد بتار ابنى وانصب له صوان كبير --

قبل مايمشى قالى يامه خدى بالك من نفسك كلى واشربى زين وماتنسيش العلاج يامه -- الدواء ثلاث مرات والبرشام صبح وليل -- قلت له يابنى مابحبش البراشيم -- قالى عشان خاطرى يامه ماتنسيش -- مين ياولادى موت ولدى ؟ مين خد الفرحه منى ؟ قالى يامه لما هانزل هاروح لعمى واخطب بته -- أصل بته غاليه عندى خلى بالك يامه منها --

انتم قلتم ابنى مات ؟ -- هو كان فى الجيش همام بس ليه هو مات ؟

قلى يابنى الرصاصه جت فى قلبه ؟ ولا فى ايده أو فى رجله ؟ هى كانت رصاصه واحده ولا اكتر من رصاصه ؟ -- هو قال آه ولا بكى ؟ شفتم دموع فى عين ولدى ولا اشتكى ؟ اصل ابنى رجيل عمره فى يوم مابكى -- كنت اما أقول آه بس كان يبكى فى حضنى ويقولى يامه ياريتنى كنت أنا --

آآآه ياولدى ياريتنى كنت انا -- آآآه يابلد مين من ولادك قتل الولد -- مين اللى خلا دم ابنى على الرمال انسكب -- مين اللى هان عليه ان أم تموت بحسرة ولد ؟ -- مين اللى خان بلد ابنى ولا الوغد اللى قتل ؟ --

هاتولى ابنى وبعلم بلادى لفوه بس اوعوا تغسّلُوه -- أصل الشهيد دينا أمرنا مانغسلوش -- ولما الدموع تسيل من عيونى غصب عنى ماتزعلوش --

وقولوا لإخواته أخوكم شهيد ماتحزنوش -- الله شايف اللى قتله وفيه حساب ياقتله يوم القيامه ماتنسهوش

حينما تسيل الدماء على الرمال ليس بمقدورنا غير البكاء

آآآه يابلد مين من ولادك قتل الولد ؟

****   عادل رشاد ****

اصدقائى الاعزاء

 بعد ان قراتها ظللتُ مدةطويلة احاول منع تأثرى بما سمعت نعم سمعتُ  صوت هذه الام  وهى تلكمنى وتكلم زملاء الكفاح   من ابنائنا على الحدود وفى الوادى وفى كل شبر من ارض الوطن   من قتل البطل  قيردون عليها بنيرة توعد ووعيد ابنك اخونا ولن نفرط فى الثأر له ولكل شهيد . ولا اقول إلا شكرا استاذ عادل

  

 تحياتى لكم ولمصر الحب كله 

              عربى السمان