( 617 ) تخاريف عادل رشاد قول ياقلم

صدر اول عدد فى يناير 2010

تخاريف ----- قول ياقلم

   بقلم عادل رشاد ..

خبير المجال الصناعى الاديب عادل رشاد

( ق )  قول ياقلم على اللى جوه القلب موجوع -- قول بس اوعى تدارى الوجوع -- وماتدوس على الألم لحسن تزيد الجروح

-- قول عن الأسى والأنين -- قول على مُرّ السنين --قول يا قلم مين فينا بيحب الألم ؟ -- مين عدى عليه اليوم وما عاش لحظه بأمل

--قول ياقلم مين ع الطريق مال -- ومين ع الطريق خان -- ومين ومين كان كل همه يشيل --قول ياقلم ياللى مليتك بدل الحبر بستان أمل  طلع الأمل من سنك مليان آهات ودموع وشجن -- ومليون آآآه على اللى راح من عمر الزمن

--قول ياقلم حكايتك ايه مع الزمن ؟ --فاكر لما كنت بتكتب موال ؟ -- لما حكيت عن كل العشاق

-- لما قلت نونه مش نانا --لما خليت العصفور حب السمكه --لما كلمت العين وقلت لها كفايه بكاء وأنين

-- فاكر ياقلم لما اتكلمت عن يوم الرحيل --ولا لما قلت بلاش عتاب وأيوه بغير -- فاكر ياقلم لما كلمت شنطة سفرك ؟ -- ورسالة المهاجر -- فاكر ياقلم لما اتكلمت عن حب الوطن ويوم العبور وقصة الشهيد

-- فاكر لما بثيت الأمل فى قلوب المساكين

-- افكرك كمان ياقلم ولا كفايه كلام ؟ -- طيب أحكى ياقلم إنت عن الأنين عن شوق السنين -- عن كل آه كانت فى كلامك وكتبتها حروفك

-- حاول ياقلم تداوى جروحك -- ولا انت عارف ياقلم ان الورق مابيرتويش غير بدموعك ؟ -- نفض همومك يا قلم وتعالى نعيش سوا بالأمل

--ايه رأيك هاجبلك قهوتك وأشغلك غنوتك -- ده فيروز كل يوم الصبح بتحب تسمعك غنوتك --إطربيه فيروز يمكن يلين

-- قولى له راجعين ياهوى -- ولا اقولك قولى له شايف البحر -- بس بلاش تقولى رمانا الهوى هايشعر بالأنين ويا الألم

-- يلا ياقلم اكتب وبلاش تكتم طيب بلاش تكتب ياريت تصرخ -- أصرخ وطلع الآه من جواك -- وهى هاتجيب لك كل الأمواج

-- فاكر ياقلم لما نسمته داعبتك وميته بلتك -- فاكر لما الموجه جاتلك تضحكلك -- فاكر لما الشمسيه جت جنبك تاخد من ضلك

-- يلا ياقلم نفض غبار الزمن وقول وانسى كل الألم -- سمع الناس حكاويك --وهات معاك مواويل

-- قولهم يالليل ياعين يالليل آه يالليل ياعين -- ده الحادثه اللى جرت والحب راح فين -- هى الميه اتبخرت ولا القلوب اتحجرت ولا البُنيه مشيت خلاص واتمخطرت وكلمات الحب اتبعترت

-- قول ياقلم ده كل حرف ليك بيداوى مليون ألم -- أوصف تانى الجمال وياريت تتكلم عن الحنان -- قول الكلمه اللى من حرفين الحاء من جوه القلب والباء قافل عليه -- اروى ظمأهم ياقلم فحبايبك عطشى لقراءة خلجات قلبك بس من غير أنين ولا ألم

-- قول ياقلم قول